گزشتہ روز ایران کے شہر اصفہان کے قریب ہونے والی مبینہ امریکی فوجی کارروائی نے عالمی سطح پر کئی سوالات کو جنم دے دیا ہے، جہاں ایک جانب مغربی میڈیا اس آپریشن کو ایک کامیاب “ریسکیو مشن” قرار دے رہا ہے، وہیں دوسری جانب ایرانی ذرائع اسے ایک بڑی عسکری ناکامی کے طور پر پیش کر رہے ہیں۔
امریکی صدر ڈونلڈ ٹرمپ کے بیان میں دعویٰ کیا گیا کہ ایک امریکی کرنل کو کامیابی کے ساتھ بچا لیا گیا، تاہم حیران کن طور پر اس کرنل کی شناخت، تصویر، ویڈیو یا کسی قسم کی تصدیق شدہ تفصیلات تاحال سامنے نہیں آ سکیں، جس سے اس دعوے کی ساکھ پر سوالیہ نشان لگ گیا ہے۔ اس کے برعکس ایران نے اصفہان کے صحرائی علاقے میں تباہ ہونے والے امریکی طیاروں اور ہیلی کاپٹروں کی ویڈیوز جاری کی ہیں، جو اس بیانیے سے مختلف تصویر پیش کرتی ہیں۔
دستیاب اطلاعات اور بعض باخبر فوجی ذرائع کے مطابق یہ کارروائی محض ایک پائلٹ کی بازیابی نہیں بلکہ ایک وسیع تر زمینی آپریشن کا ابتدائی مرحلہ تھی، جس کے لیے اصفہان کے ایک دور دراز مقام پر لینڈنگ کی گئی تاکہ داخلی راستوں کو محفوظ بنایا جا سکے۔ تاہم یہ منصوبہ مبینہ طور پر ناکام ہو گیا، جس کے بعد پینٹاگون نے اسے “ریسکیو مشن” قرار دے کر اصل صورتحال چھپانے کی کوشش کی۔
رپورٹس کے مطابق اس کارروائی میں دو C-130 ہرکولیس طیارے تباہ ہوئے، جن کی مجموعی مالیت تقریباً 60 ملین ڈالر بنتی ہے، جبکہ چار MH-6 “لٹل برڈ” ہیلی کاپٹرز بھی چھوڑ کر تباہ کیے گئے۔ مزید برآں، سابق سی آئی اے اہلکار لاری جانسن کے مطابق اس آپریشن میں 6 امریکی فوجی ہلاک ہوئے اور مجموعی مالی نقصان 400 ملین ڈالر سے تجاوز کر گیا۔
اسی دوران ایرانی فضائی دفاعی نظام نے بھی نمایاں کارکردگی دکھانے کا دعویٰ کیا ہے، جس کے مطابق گزشتہ 24 گھنٹوں میں ایک MQ-1 پریڈیٹر، ایک MQ-9 ریپر اور ایک ہرمس 900 ڈرون مار گرائے گئے۔ اگرچہ امریکی میڈیا ان نقصانات کی مکمل تصدیق نہیں کر رہا، تاہم مختلف ذرائع سے آنے والی معلومات اس بات کی نشاندہی کرتی ہیں کہ صورتحال محض ایک سادہ ریسکیو آپریشن سے کہیں زیادہ پیچیدہ تھی۔
اگر یہ مان بھی لیا جائے کہ مبینہ پائلٹ کو نکال لیا گیا، تب بھی اس مشن کی قیمت — جانی اور مالی دونوں لحاظ سے — غیر معمولی طور پر زیادہ دکھائی دیتی ہےمحتاط اندازے کے مطابق دس کروڑ امریکی ڈالر اور چھ امریکی فوجیوں کی ہلاکت اس مشن کا انجام ٹھہری ہے اور آنے والے دنوں میں اس واقعے کی مزید تفصیلات سامنے آنے کا امکان ہے۔
