محمد رضی الرحمن کا تعلق ضلع اٹک کی تحصیل فتح جنگ کے نواحی گاوں حطار کے ایک مذہبی گھرانے سے ہے، آپ کے والد محترم قاضی خضرالزمان ضیاء 35 سال تک مذہبی و دنیوی درس و تدریس میں مصروف عمل رہے جبکہ اپنے علاقے میں سماجی خدمت کے حوالے سے مصروف عمل رہتے ہیں، انہی کی شخصیت کا اثر محمد رضی الرحمن پر ہوا، آپ نے قلمی نام اپنے لئے رضی طاہر منتخب کیا اور اسی نام سے جانے و پہچانے جاتے ہیں، سال 2006 میں میٹرک کرنے کے بعد تعلیمی سلسلہ نجی طور پر شروع کیا اور میٹرک کے بعد تعلیم کا سفر پرائیویٹ ہی کیا۔
سال 2010 میں رضی طاہر نے مصطفوی سٹوڈنٹس موومنٹ میں باقاعدہ بطور ضلعی صدر ذمہ داریاں سنبھالیں اور اس طلبہ تنظیم کے ساتھ 2014 تک وابستہ رہے جب آپ کے پاس مرکزی سیکرٹری جنرل کی ذمہ داری تھی۔
صحافت کا آغاز روزنامہ سماء میں کالم نگاری سے کیا، بعدازاں روزنامہ نئی بات، روزنامہ دن اور روزنامہ جناح میں کالم لکھتے رہے، آپ کے کالمز آن لائن ویب سائٹس پر بھی دیکھے جاسکتے ہیں، اے آر وائی نیوز، دنیا نیوز، اردو پوائنٹ اور باغی سمیت کئی ویب سائٹس پر بلاگز لکھتے ہیں۔
آپ نے 2015 میں نیو ٹی وی جوائن کیا اور بطور سوشل میڈیا کوآرڈینیٹر اپنی ذمہ داریاں سنبھالیں، بعدازاں تہلکہ ٹی وی، دن نیوز، نشان منزل، روزنامہ لیڈر اور ہفت روزہ سین کے ساتھ وابستہ رہے۔
سال 2016 میں آپ نے وائس آف پاکستان کے نام سے فورم قائم کیا اور اس سلسلے میں پاکستان کے پہلے سوشل میڈیا ایوارڈ شو کروانے کا اعزاز حاصل کیا، آپ وائس آف پاکستان کے بانی صدر کے طور پر خدمات سرانجام دے رہے ہیں۔ سال 2018 میں اسی پلیٹ فارم سے آپ نے پھر وائس آف پاکستان سوشل میڈیا کانفرنس منعقد کروائی۔
سال 2019 میں ایک سال کیلئے کشمیر یوتھ الائنس کے سیکرٹری جنرل منتخب ہوئے، اس دورانیے میں کشمیر ملین مارچ، کشمیر سے متعلق ملک گیر سیمینارز، عوامی مہم اور سوشل میڈیا ٹرینڈز کروائے۔
رضی طاہر سیپیم کے نام سے سوشل میڈیا اور میڈیا مارکیٹنگ کی کمپنی بھی چلاتے ہیں، اس کے علاوہ ان کے حصے میں کئی مہمات آئی ہیں جن میں بچوں کے استحصال کے خاتمے کیلئے ملک گیر مہم سٹاپ چائلڈ ایبیوز کے نام سے ہے۔ اسی سلسلے میں ڈی پی او اٹک سید خالد ہمدانی سے تعریفی سند لے چکے ہیں۔
آپ نےسوشل میڈیا کے حوالے سے پازیٹو پاکستان فاونڈیشن، کشمیر ایکٹیویزم کے حوالے سے والنٹیئر فورس اور سماجی خدمات کے حوالے سے ڈریم بلڈرز سے مختلف مواقع پر ایوارڈ حاصل کیے۔