ایران کے طلبہ نے RoboCup Asia-Pacific 2025 میں تاریخی کامیابی حاصل کی ہے، جس نے ملک کی تعلیمی اور تکنیکی صلاحیتوں کو عالمی سطح پر اجاگر کیا۔ ڈاکٹر محسن توکلی کی رہنمائی میں Mosito Innovation ٹیم، جس میں 8 نوجوان ہونہار شامل ہیں، نے ابوظبی میں ہونے والے اس مشہور مقابلے میں شرکت کی جہاں دنیا کے 22 ممالک کے بہترین روبوٹکس ٹیمیں مد مقابل تھیں۔
مقابلے کے دوران ایرانی ٹیم نے اپنی تخلیقی صلاحیت، تکنیکی مہارت، اور ٹیم ورک کے ذریعے شاندار کارکردگی دکھائی، جس کے نتیجے میں انہیں سونے کا تمغہ حاصل ہوا۔
اس موقع پر ڈاکٹر محسن توکلی نے کہا کہ یہ کامیابی صرف ان 8 طلبہ کی محنت کا نتیجہ نہیں بلکہ ایران میں روبوٹکس اور سٹیم (STEM) تعلیم میں سرمایہ کاری اور نوجوانوں کی تربیت کا ثبوت ہے۔ انہوں نے مزید کہا کہ مستقبل میں ایران کے نوجوان بین الاقوامی سائنسی اور تکنیکی میدانوں میں مزید کامیابیاں حاصل کر کے ملک کا نام روشن کریں گے۔یہ کامیابی ایران کے تعلیمی نظام اور نوجوانوں کی صلاحیتوں کے لیے باعث فخر ہے، اور عالمی سطح پر ایران کی ٹیکنالوجی اور روبوٹکس میں پیش رفت کو نمایاں کرتی ہے۔ Mosito Innovation ٹیم کی یہ شاندار کامیابی مستقبل میں مزید بین الاقوامی مقابلوں میں ایرانی ٹیموں کے لیے راہ ہموار کرے گی اور نوجوان سائنسدانوں اور انجینئرز کے لیے حوصلہ افزائی کا باعث بنے گی۔
یہ پہلا اعزاز نہیں ہے،ایران کے نوجوان طلبہ نے عالمی روبوٹکس اور سائنسی مقابلوں میں اس سے قبل بھی شاندار کامیابیاں حاصل کی ہیں،نومبر میں تین رکنی ایرانی ٹیم نے نائنٹ ایڈیشن آف فسٹ گلوبل چیلنج (FGC) میں دو سلور میڈلز حاصل کیے، جو ایک اولمپکس طرز کا بین الاقوامی روبوٹکس مقابلہ ہے اور پاناما میں منعقد ہوا۔اسی طرح ستمبر میں ایرانی طلبہ نے TEKNOFEST مقابلے میں اختراعات اور جدید ٹیکنالوجیز کے شعبے میں پہلی اور دوسری پوزیشن حاصل کر کے نئی نسل کی صلاحیتوں کا مظاہرہ کیا، خصوصاً روبوٹکس، مصنوعی ذہانت، اور تکنیکی اختراعات میں۔۔ اس مقابلے میں جرمنی، جنوبی کوریا، ازبکستان، روس، نیدرلینڈز، بھارت، ایران، فلپائن، ملیشیا، اور پیراگوئے سمیت 56 ممالک کے 980 منصوبے شریک تھے۔اسی طرح ایران کی روبوٹکس اور ارضیاتی سائنس ٹیموں نے فریا (FIRA) اور بین الاقوامی ارضیاتی سائنس اولمپیاڈ (IESO) میں بھی مختلف اعزازات حاصل کیے۔
دوسری جانب FIRA 2025 ورلڈ روبوٹکس اینڈ AI مقابلہ جنوبی کوریا کے شہر ڈیگو میں منعقد ہوا، جہاں ایرانی ٹیم نے 11 ایوارڈز جیتے۔ جبکہ IESO میں چائنا کے شہر جی ننگ میں ایران کے طلبہ نے چار برونز میڈلز حاصل کیے۔اسی طرح FIRA RoboWorld Cup and Summit 2025جو کہ 11 سے 15 اگست تک ہوا، جس میں ایرانی وفود نے ایئر لیگ اور اسپورٹ لیگ (19 سال سے کم عمر طلبہ) سمیت چیلنج اور یوتھ لیگ میں پانچ چیمپئن شپ جیتیں۔ اس کے علاوہ، 7 سے 17 سال کے ایرانی طلبہ نے Kazakhstan RoboLand 2025 میں سات ممالک میں دوسرے نمبر کا مقام حاصل کیا، جو 27 سے 29 مارچ تک کاراگانڈا شہر میں منعقد ہوئے۔ اس تقریب میں سات ممالک کے 750 سے زائد نوجوان موجدین نے حصہ لیا، جبکہ 362 ٹیمیں 23 زمروں میں مقابلہ کر رہی تھیں۔یہ سب کامیابیاں بتاتی ہیں کہ ایران نے جدید سائنسی میدان میں ترقی کی بلندیاں سر کی ہیں اور عالمی پابندیوں کو جوتے کی نوک پر رکھا ہے۔
یہ تمام کامیابیاں ایران میں نوجوانوں کی تعلیمی، تکنیکی اور تخلیقی صلاحیتوں کا روشن مظاہرہ ہیں اور ملک کی بین الاقوامی سائنسی اور روبوٹکس شناخت کو مضبوط کرتی ہیں۔ نوجوان ایرانی طلبہ کی یہ مسلسل کامیابیاں مستقبل میں بین الاقوامی مقابلوں میں ایران کا پرچم بلند کرنے کا سبب بنیں گی اور نئی نسل کے سائنسدانوں و انجینئرز کے لیے حوصلہ افزائی کا ذریعہ بنیں گی
